1Ti 2 | YML | STEP | Nagami, a na velu'ase'asemi, nuanuaku 'omi tovetumaganavo tutuya fuedi 'wa na vevelu'ui tomotoga fuedi faifaidi. 'Wa na vevelu'ui bega Yaubada i na vevesauluva-'atumaina 'waidie, we'e ava'ai i 'i'idewadiga faifaidi 'wa na vevekaiwa.

1 Timothy 2

Velu'ui faifaina.

1 Nagami, a na velu'ase'asemi, nuanuaku 'omi tovetumaganavo tutuya fuedi 'wa na vevelu'ui tomotoga fuedi faifaidi. 'Wa na vevelu'ui bega Yaubada i na vevesauluva-'atumaina 'waidie, we'e ava'ai i 'i'idewadiga faifaidi 'wa na vevekaiwa. 2 Siwe mogitana side kumanidiavo faifaidi 'wa na vevelu'ui. Kini wata 'ifwaidi toveimea bega yada velu'ui 'waidiega Yaubada i na 'ivaisedi yada mia i na ve'atumai, vetalaga kebu, wata tutuya fuedi ta na vevesauluva tonovina Yaubada yana nuanua bani'odi. 3 I lubwaineda bani'odi ta na vevesauluvedi, Yaubada 'ada To'ita'ita'i 'ana 'eba kiavesosoana. 4 I na sosoanaga fai nuanuana tomotoga matatabudi i na 'ita'ita'iedi sakona 'wainega wata yana nuanua tonovidi i na 'asetadi. 5 Fai Yaubada 'aiseotogina i miamia, we'e tamu tomotogaotoga 'ana wagava Iesu Keliso 'aiseotogina 'wainega tomotoga 'adi fata i na veiana Yaubada taiadi. 6 Taunina yawaina i tauyeni bega tomotoga matatabuda i tuveobuda sakona 'wainega. Yaubada 'aisena Iesu yana souyagi 'ana tutuya i veimea, i maiga yada 'eba 'isa Yaubada nuanuana tomotoga matatabuda i na 'ita'ita'ieda. 7 Fai Yaubada nuanuana tomotoga fueda i na 'ita'ita'ieda, begaidi yau i venua'ivineku i vetuneku bega a na vetomata'aulele wata a na veve mali tomotoga taunidi kebu Diu 'waidie. Nuanuana a na lalau'age bega tomotoga i na vetumagana Yaubada yana nuanua tonovidi 'waidie. Mogitana i venua'ivineku a na vevetomata'aulele, kebu a da vevekaliga.

S4 2 Fit 3:8-9S7 Fol 9:15

Iaveta wata vevine yadi sauluva tafalolo faifaina.

8 Nuanuaku iaveta 'awalawa matatabuna 'waidie i na vevelu'ui. Yadi velu'ui 'waidie, nimadi i na silakaidi Yaubada 'waineye, siwe fai nimadinidi 'waidiega Yaubada i subisubiai, kebu i da lubwainedi 'waidiega i na sakosakona, bani'odi kebu i na nunuasakoga wata kebu i na veve'ikwayekwayega.

9 Wata kebu nuanuaku vevine i na vaigavu-vebovebogi ma yadi vebaisa. Nuanuaku ma yadi nuaobu i na vaigavu ava'ai i lubwaineniga, bani'odi i na vaigavuyedi. Vevine totafalolo i lubwainedi yadi sauluva 'atumaidi 'waidiega tomotoga i na subiadi. We'e kebu 'adi vaigavu 'waidiega 'adi subia i na veluagai, bani'odi 'odo'odo fuedi, kileu 'aninamanamalidi, 'alo kaleko 'adi tutula bwaikidi. 11 Vevine i lubwainedi ma yadi nuaobu i na vavainenegamo bega ma yadi 'aseta. 12 A talaboda kebu nuanuaku vevine i na ve iaveta 'waideye, wata kebu i na veimeyeda, i na ve'wadamo i na miamiani. 13 A ve'etobodaga fai ta 'asetai Yaubada nagami Adama i 'idewai, mulieta Ive. 14 Seitani kebu Adama i da vekalieni, Ive i vekaliedi, Yaubada yana ve'etoboda i geuya i sakona. 15 I sakonaga, begaidi venatuna 'waineye vevine veviga i veveluagai. Siwe 'ai'edi i na vevetumagana Yaubada 'waineye, i na nunuakalikali, wata ma yadi nuaobu i na vevesauluva 'atumaina mataneye, i na 'ita'ita'iedi.

S9 1 Fit 3:3-4S10 1 Tim 5:10S13 Nag 2:7,22S14 Nag 3:6